08.08.18


TODAS ESAS FLORES

  Tamén se pode celebrar o que non foi. Eses bicos que acumulei agora marchan de min pola respiración entrecortada. As imaxes que seguen movéndose, agora en despedida. Resistíndose a quedar. Como unha tormenta perfecta. O teu apelido diante do meu. Coller a túa man e que pareza que foi sempre así. A casa dos teus avós como o noso espazo. Vivir e rir antes xuntos en Cacheiras. Os días 21 que seguirei celebrando sen facelo porque atoparte de fixo máis eu. O feliz de pelexar por ti (por un nós) aínda que fosen uns meses. Sorprenderme de necesitar sempre volver a ti, como ese fogar feito a medida. Este tempo as cancións e os poemas falaron de ti, da suavidade da túa espalda que acariciei unha vez nun abrazo. Ese lugar no que quería vivir. O bico culpable que non puido multiplicarse e chegar a voar libre en forma de outros miles. O mar da Lanzada gardando segredos que rachan sen saber por que. Preparar a túa caixa de regalos como un neno que voa pola casa buscando unha ilusión cada vez mellor.

Quedouse no primeiro voo, como ese paxaro que vimos morrer o outro día lanzándose a voar por primeira vez. Zas. Seco. Igual chegas a ser o meu mellor pasado, ou a miña mellor posibilidade de futuro. A posibilidade que caeu coa realidade. A estadística. A frase de meu pai que dicía que esas cousas sempre saen mal.
Como no teatro, os soños soños son, e ti eras o verso que quería repetir día tras día para reinventar a maxia xuntos no gran teatro do mundo. O amor fugaz que non se chega a probar co corpo tamén pode ser amor. Sinto moito a presión e o negativo que pasou e moito orgullo por todo o bo. Nunca perder foi tan duro nin tivo nunca tanto sentido polo poder da nosa conexión. Agora penso naquela xenebra e aquel baile que nos podían levar a un agora diferente. Vou ver onde sitúo todas as imaxes que tiven neste tempo da nosa voda. A que máis se repetía últimamente era cantarte Soñar contigo con Pol no piano e Carla tocando a percusión que queira. Molaba xD.

Por esas flores que nunca che darei, que tamén son bonitas. Quero que queden no mellor lugar posible.

Dejar un comentario

Tu dirección de correo electrónico no será publicada. Los campos obligatorios están marcados con *