22.03.17


LENDA DE MULLER, de THAMIZHACHI THANGAPANDIAN

É o mesmo lugar primitivo.

A mesma vella árbore

baixo a cal naceu como “Eva”…

A árbore baixo a cal lle ensinaron:

“a timidez é beleza”, “o desexo é pecado”.

Predicáronllo

esa folla e aquela froita.

A mesma serpe fica nesa árbore co seu veleno.

Despois de arrincar as ás anxelicais

Eva ocúpase agora de

afiar as longas unllas dos demos.

Era unha vella historia:

ela cos seus mitos

a voltas por dentro do valado

construíndo con historias rústicas de tempos pretéritos.

Onte a historia era outra.

Ela sangraba en

búnquers e cárceres do exército,

o seu peito enchoupado de sangue.

Mais hoxe,

tras curar as feridas,

esas pulseiras rotas,

e violacións brutais…

emerxeu coma unha nova Eva,

que volve estar de novo no bosque.

É a mesma árbore primitiva.

Mais aquí,

solitaria coma unha Eva renacida,

senta abaixo a árbore vanni.

A árbore que lle dá forza para sobrevivir.

Agora, proclama,

non queremos folla nin froita

que vestir ou saborear.

Ao contrario,

somos felices coa nueza da liberdade!

(A árbore “vanni” (Prosopis cineraria) crece na xungla de Mullaitheevu, ao norte de Sri Lanka, onde o exército de Sri Lanka masacrou a poboación para destruír un enclave fundamental dos Tigres Támiles en xaneiro de 2009)

Dejar un comentario

Tu dirección de correo electrónico no será publicada. Los campos obligatorios están marcados con *